Perezida wa Repubulika y'u Rwanda, Paul Kagame, mu ijoro ryo ku wa 12 Kanama 2026, yitabiriye umukino wa UEFA Super Cup wabereye mu mujyi wa Salzburg muri Austria. Uyu mukino wahuje amakipe abiri afitanye imikoranire n’igihugu cyu Rwanda muri gahunda ya Visit Rwanda ariyo Paris Saint-Germain yo mu bufaransa, yatwaye UEFA Champions League, na Aston Villa yo mu Bwongereza, yatwaye UEFA Europa League ndetse ikaba ari umufatanyabikorwa mushya wa Visit Rwanda.
Ukwitabira kwa Perezida Kagame kuri uyu mukino kwagaragaje uburyo u Rwanda rukomeje gukoresha siporo nk'inzira yo kwamamaza ubukerarugendo, gushora imari no kumenyekanisha igihugu ku rwego mpuzamahanga.
Mu myaka ishize, binyuze muri gahunda ya Visit Rwanda, U Rwanda rwagiranye amasezerano n'amakipe akomeye ku Mugabane w'u Burayi arimo PSG, Arsenal, Atletico De Madrid ndetse na Aston Villa iherutse kwiyongera kuri aya makipe muri Nyakanga 2026. Aya masezerano ateganya kwamamaza u Rwanda binyuze ku myambaro y'amakipe no mu bikorwa bitandukanye bifasha guteza imbere ubukerarugendo, siporo n'ishoramari.
Umukino wa UEFA Super Cup warangiye PSG itsinze Aston Villa ibitego 2-1, ihita yegukana iki gikombe ku nshuro ya kabiri yikurikiranya. Ibitego bya PSG byatsinzwe na Khvicha Kvaratskhelia na Désiré Doué, mu gihe Brian Madjo w'imyaka 17 y'amavuko yatsindiye Aston Villa igitego rukumbi, anaca amateka yo kuba umukinnyi muto utsinze muri iri rushanwa.
Binyuze muri gahunda ya Visit Rwanda, izina ry'u Rwanda rikomeje kugaragara mu marushanwa arebwa n'abafana ba ruhago babarirwa muri za miliyoni ku isi yose, ibintu bifatwa nk'inyungu ikomeye mu kumenyekanisha igihugu no guteza imbere ubukungu bushingiye ku bukerarugendo na siporo.
No comments yet. Be the first to comment!